បន្ទាប់ពីរដ្ឋបាលខេត្តស្វាយរៀងបានប្រារព្ធពិធីប្រណាំងទូកអស់រយៈពេល ២ ថ្ងៃគឺមានបងប្អូនប្រជាពលរដ្ឋភ្ញៀវជាតិអន្តរជាតិមកទស្សនាប្រមាណ ១០ ម៉ឺននាក់នៅច្រាំងទន្លេវ៉ៃគោធ្វើអោយបរិយាកាសនៅក្នុងទឹកក្រុងស្វាយរៀង ខេត្តស្វាយរៀងពោរពេញទៅដោយមនុស្សម្នាអ៊ូអរសប្បាយរីករាយទាំងថ្ងៃទាំងយប់។នៅព្រឹកថ្ងៃ៣០ ខែតុលា ឆ្នាំ២០២២នេះ ជាថ្ងៃផ្តាច់ព្រ័ត្រនៃពិធីប្រណាំងទូកខ្នាតអន្តរជាតិ និងទូកក្តារបីសន្លឹក នៅទន្លេវ៉ៃគោ ក្រុងស្វាយរៀង ខេត្តស្វាយរៀង ក្រោមអធិបតីភាពលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រី ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាប្រធានក្រុមការងាររាជរដ្ឋាភិបាលចុះមូលដ្ឋាននៅខេត្តស្វាយរៀង។ ពិធីនេះមានការអញ្ជើញចូលរួមពីឯកឧត្ដមនាយឧត្ដមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងមេបញ្ជាការកងរាជអាវុធហត្ថ រាជធានីខេត្តក្រុងទូទាំងប្រទេស ។លោកជំទាវអ្នកតំណាងរាស្រ្តមណ្ឌលខេត្តស្វាយរៀង ឯកឧត្តម ជុំ ហាត ប្រធានក្រុមប្រឹក្សាខេត្ត ឯកឧត្ដម ម៉ែន វិបុល អភិបាលខេត្ត និងឯកឧត្តមអភិបាលរងខេត្ត អភិបាលព្រះវិហារ កំពង់ចាម បន្ទាយមានជ័យ និងកំពង់ឆ្នាំង ឯកឧត្ដម លោកជំទាវសមាជិកក្រុមប្រឹក្សាខេត្ត ឯកឧត្តម លោកជំទាវអភិបាលរងខេត្ត ក្រុមការងាររាជរដ្ឋាភិបាលចុះជួយខេត្ត និងប្រតិភូខេត្តតៃនិញ ខេត្តឡុងអាន នៃសាធារណរដ្ឋសង្គមនិយមវៀតណាម ព្រមទាំងលោក លោកស្រីភ្ញៀវជាតិ អន្តរជាតិ […]
